Forskingsrådet styrkjer samarbeid med afrikanske land

– Forskings- og innovasjonssamarbeid med afrikanske land blir berre viktigare og viktigare. Desse tiltaka vil styrkje samarbeid og vere med å utvikle verdifull kunnskap, seier Mari Sundli Tveit, administrerande direktør i Forskingsrådet.

I august 2024 presenterte Regjeringa ein ny strategi for Noregs samarbeid med afrikanske land, med eit auka fokus på forsking og utdanning. Som ein del av denne strategien har Forskingsrådet utvikla ein eigen plan for Afrika, der samarbeid gjennom nasjonale tiltak og deltaking i Horisont Europa blir styrkt.

Auka finansiering til INTPART Afrika

INTPART Afrika får meir finansiering for å inkludere fleire afrikanske land enn berre Sør-Afrika. Frå 2026 til 2030 vil programmet få 10 millionar kroner kvart år, det vil seie totalt 40 millionar kroner. Desse midlane blir tilgjengelege i 2025.

Målet med dette tiltaket er å hjelpe norske fagmiljø med å byggje eller styrke langsiktige samband med sterke fagmiljø i Afrika. Dette vil særleg skje gjennom samarbeid om høgare utdanning og forsking.

Vi ønskjer å utvikle fleire verdsleiande fagmiljø i Noreg, samtidig som vi aukar kunnskapen i begge regionane. Samarbeidet med dei afrikanske partnarane skal vere rettferdig og følgje retningslinjer der begge partar bidreg aktivt og har nytte av prosjekta.

• Du kan lese meir i utlysingsteksten for Internasjonale partnerskap for framifrå utdanning, forsking og innovasjon (INTPART).

Endring prosjektetableringsstøtte (PES)

Det blir også gitt ekstra støtte til norske søkjarar som inkluderer afrikanske partnarar i Horisont Europa-prosjekt. Denne støtta er 150 000 kroner per søknad og gjeld samarbeid i søyle 2.

• Les meir om PES – Støtte til prosjektetablering retta mot Horisont Europa