112 millionar kroner til forskarskular

– Vi treng fleire med forskarkompetanse i arbeidslivet, både næringsliv og offentleg sektor. Forskarskulane bidreg til å gjere doktorgradsutdanninga både meir arbeidsrelevant og tverrfagleg. Derfor er eg glad for å kunne styrkje forskarskulane og den viktige jobben dei gjer med 112 millionar kroner, seier forskings- og høgare utdanningsminister Sigrun Aasland.

Nasjonale forskarskular er ei ordning som skal styrkje norsk forskarutdanning. Forskarskulane er eit supplement til institusjonane sine eigne doktorgradsprogram. Gjennom forskarskulane får ph.d.-studentane spesialiserte kurs, fagleg rettleiing og tilgang til faglege nettverk mellom anna i næringslivet og offentleg sektor. Forskarskulane skal på denne måten sikre arbeidslivsrelevans for forskarar.

Mellom anna får

• Forskarskulen NORA-HS: Norwegian graduate School for how AI impacts humanities and society 15,5 millionar  kroner for å utdanne forskarar om korleis kunstig intelligens påverkar samfunnet. Skulen vil utdanne framtidige forskarar til å analysere korleis kunstig intelligens påverkar demokrati, lovgiving, utdanning, kultur, velferd og tryggleik. Forskarskulen blir leidd av UiO med ei rekkje partnarar.
• Forskarskulen Mima - Microbiology Matters får 16 millionar kroner til å utdanne forskarar innan mikrobiologi om førebygging av infeksjonssjukdommar og auka kunnskap om korleis mikroorganismar påverkar menneske og dyr, og dessutan utvikling av nye medisinar og vaksinar. Forskarskulen blir leidd av UiT og har med partnarar frå privat og offentleg sektor.
• Forskarskulen Partners-inCare: Municipal Health Care Research and Innovation school får 16 millionar kroner og skal fokusere på offentleg sektor, og rettar seg særleg mot behovet til kommunar for forsking og innovasjon i primærhelsetenesta. Skulen blir leidd av OsloMet.
• Forskarskulen "Norwegian Research School in Global Health for Sustainable Futures" får 16 millionar kroner for å styrkje forskarutdanninga innan global helse med mål om å redusere helseulikskap og bidra til FNs Berekraftsmål 3 “God helse for alle” gjennom berekraftige helseforbetringar for sårbare grupper i låg- og lågare mellominntektsland. Skulen blir leidd av UiB og har relevante nordiske og afrikanske partnarar.

– Vi skal løyse store samfunnsutfordringar dei neste åra. Det krev at vi både utviklar og tek i bruk ny kunnskap. Vi har sterke forskingsmiljø i Noreg og vi ønskjer å bidra til auka tverrfagleg samarbeid mellom akademia og resten av samfunnet. Forskingsrådet oppmodar forskarskulane til å samarbeide seg imellom og vi ser fram til idé- og erfaringsutveksling, seier administrerande direktør i Forskingsrådet Mari Sundli Tveit.

Desse forskarskulane får finansiering