Nyleg bad samfunnsoppdraget om inkludering av barn og unge om innspel via nettsida, og responsen har vore god. Heile 150 bidrag har komme frå enkeltpersonar, verksemder, organisasjonar og forskarar.
– Vi har fått mange nyttige innspel til det vidare arbeidet. Vi vil gå gjennom innspela, og dei vil gå inn i kunnskapsgrunnlaget vårt, seier Gunnlaug Daugstad, som leier den operative gruppa for samfunnsoppdraget.
Innspela spenner breitt og omfattar tema som førebygging, tidleg innsats og den viktige rolla som skulen har. I tillegg til forsking, samarbeid på tvers av sektorar og verdien av kultur og frivillige organisasjoner. Mange gir også uttrykk for at dei ønskjer å bidra i arbeidet med samfunnsoppdraget.
– Eg vil takke alle som har teke seg tid til å komme med innspel til oss. Vi vil i tida framover gjennomføre fleire innspelsmøte, slik at endå fleire får høve til å involvere seg, seier Gunnlaug Daugstad.
Innspelsmøta vil gå føre seg fleire stader i landet, og startkonferansen vil gå av stabelen allereie 2. november på Grorud samfunnshus i Oslo.
